بعد تخلص اللغة ويكون مستواك فيها ممتاز بنرتب ليك المقابلا بتاعة العمل (حتى لو ما امتحنت لسه امتحان شهادة اللغة) ، ويفضل تمتحن أول ، بتاخد كذا فرصة لو ما نجحت من أول مقابلة لكن الحمد لله أغلبية خرجينا بيتم قبولهم من أول مقابلة..

بعد قبولك بواسطة المستشفى برسلوا ليك المطلوبات وعقد العمل في البلد اللي انت متواجد فيها
وبتاخد فترة ترتب فيها أوراقك بصورة نهائية (الترجمة والتوثيق) والشركة بترتب ليك موضوع البيشايد (أوراق المعادلة)
الإجراءات بتختلف من مقاطعة للتانية علشان كده بتعرف اجراءك حسب المقاطعة اللي بيتم قبولك فيها بعدين..

لو تم قبولك للعمل في مستشفى X  وانت برضو وافقت علي عقد العمل بتاعهم حيرسلوا ليك العقد وكل المستندات المطلوبة في السفارة للحصول علي الفيزا “العقد ، السكن والتامين ، شهادة المرتب ، مستندات من مكتب العمل بالالمانيا ..الخ” 

حتطبع كل الاوراق المرسلة وتحجز مقابلة حصول لفيزا عمل في السفارة..

مطلوبات الحصول علي فيزا عمل :-

1- كل المستندات المرسلة “نسختين ملونات”

2-إستمارة موجودة في موقع السفارة “طلب الحصول لفيزا ” تطبعها نسختين وتملاهم”

3-صورتين شخصيتين حديثات.

4-نسختين من كل الشهادات ملونات + الاصل .

5-حجز موعد في السفارة وطباعة الحجز .

لمقابلة السفارة رسوم الفيزا اتأكدوا منها كم مكتوبة فى الموقع..

بعدالمقابلة بستلمو منكم الجواز..

 وبقولوا ليك بنتصل عليك وفعلا بتصلوا عليك بعد أسبوعين بالكتير وبقولوا ليك تعال استلم الجواز..

بعد الحصول علي فيزا ح تحجز عادي للسفر وتسافر..

لمن تصل المانيا عندك فترة تدريبية م بتقل من 6 شهور  وكأقصي 13 شهر بتدرس مستوي اللغة B2 إذا كان مستواك B1 بالاضافة للتأهيل في جانب التمريض ” نظري وعملي”..

طوال الفترة التدريبية بكون عندك مرتب شهري كويس ممكن توفر منه..

بعد تخلص الفترة وتمتحن امتحان ممكن تسمية “امتحان التسجيل الدائم” بيتعدل مرتبك كأي ممرض ألماني وبحق ليك تستقدم عائلتك” الزوج/ة + الأولاد”..

وبتكون حققت جزء كبير من حلمك..

الراتب قبل فترة المعادلة ممكن يصل ل2500 يورو ، وبعد فترة المعادلة بكون من 3000 يورو الى 6500 وطبعاً الحاجة دي بتعتمد على عوامل كتيرة (الولاية ، المستشفى ، خبرتك …إلخ) 

..

في تفاصيل تقديرية بتفيدك برضو:

السكن بحدود 300 يورو.. وممكن يزيد حسب المدينة

المعيشة للعازب المتوسط 200 يورو.. وطبعاً بتزيد حسب صرفك واحتياجاتك..

التأمين الصحي بكون متوفر ليك ولكل أسرتك ..

مجانية التعليم في ألمانيا لأولادك..

فرص التخصص للتمريض مجانية..

كمان موجود تأمين البطالة لو لا قدر الله اتفصلت لأي سبب..

النجاح عايز اجتهاد بعد توفيق ربنا

تجتهد في اللغة ، تمتحن ، تنجح ، تسافر بعون الله

نتمنى ليكم جميعاً التوفيق والسداد